ՍՈՎԵՏԱՇԵՆԻ ԱՂԲԱՎԱՅՐԸ ՉԻ՞ ՍՊԱՌՆՈՒՄ ՀԱՍԱՐԱԿՈՒԹՅԱՆ ԱՌՈՂՋՈՒԹՅԱՆԸ

Բնապահպանության նախարարության թեժ գծով վերջերս ահազանգ էր ստացվել, թե Նուբարաշենի խճուղու վրա գտնվող Սովետաշենի աղբավայրի պատճառով այդ տարածաշրջանում բնակվողների մոտ ալերգիկ հիվանդություններ են նկատվում: Ըստ բնապահպանության նախարարության կանխարգելման ու վերահսկման աշխատանքներով զբաղվող պետական տեսչության, ահազանգը համապատասխանել է իրականությանը:

Խնդրի վերաբերյալ Panorama.am-ի թղթակիցը զրուցեց առողջապահության նախարարության պետական հիգիենիկ հակահամաճարակային տեսչության Էրեբունու և Նուբարաշենի տարածքային կենտրոնի պետ Լենա Աղաբաբյանի հետ: «Այս ահազանգի հիման վրա մենք տեղամասում ստուգումներ ենք անցկացրել և պարզել ենք, որ այն իրականությանը չի համապատասխանում»,-նշեց Լ. Աղաբաբյանը: Նրա հավաստմամբ, Սովետաշենի աղբավայրը մեկուսացված է բնակելի տարածքներից և հետևաբար մարդկանց առողջության համար վտանգ չի ներկայացնում:

Աղբավայրի տարածաշրջանում բնակվողներին սպասարկում է 3 պոլիկլինիկա, որոնց աշխատակիցների հետ ահազանգից հետո աշխատել է 16 բժիշկներից կազմված մասնագետների խումբը: Ըստ Լ. Աղաբաբյանի, ստուգվել են տարածքի բժշկական կանչերը: «Նման տեղեկատվություն թաղապետարաննեը չունեն, համատիրությունները, պոլիկլինիկաները նույնպես, մենք լրացուցիչ աշխատել ենք և ոչ մի դեպք չենք գրանցել»,-ասաց նա: Լ. Աղաբաբյանի համոզմամբ, Սովետաշենի աղբավայրի խնդիրն իրոք մտահոգիչ է, սակայն. «Մինչ օրս, տարածաշրջանում կոնկրետ ալերգիկ դեպքերի վերաբերյալ ահազանգեր չեն գրանցվել»: