«Նաիրիտցիները» կրկին փողոց դուրս կգա». «Հրապարակ»

«Նաիրիտ» ՓԲԸ-ի աշխատակիցները որոշել են անժամկետ բողոքի ակցիաներ սկսել: Այսօր, առավոտյան ժամը 10-ին նրանք հավաքվելու են ՀՀ կառավարության շենքի մոտ: Ակցիաներին մասնակցելու են գործարանի արհմիությունը, աշխատողները, նաև կոլեկտիվի այն անդամները, որոնք հարկադիր պարապուրդի մեջ են. գրել է «Հրապարակը»:

«Ակցիայի կազմակերպիչները զանգահարել են մարդկանց և կանչել տներից: Ավելի վաղ «Նաիրիտի» աշխատակիցները նամակով դիմել էին ՀՀ կառավարությանը, որով երկու հարցադրում էին արել. ե՞րբ է աշխատելու գործարանը, և ի՞նչ ժամանակացույցով են մարելու իրենց աշխատավարձերը: Նաև վերջնագիր էին ներկայացրել, որ եթե այս հարցերի պատասխաններն իրենք չստանան, ապա բանվորները դուրս կգան փողոց: Բողոքի ակցիայի մասնակիցներից մեկը երեկ մեզ հայտնեց, որ իրենց վերջին անգամ աշխատավարձ են վճարել մայիսի 20-ին: Էներգետիկայի և բնական պաշարների նախարար Երվանդ Զախարյանը կոլեկտիվի ներկայացուցիչների հետ հանդիպման ժամանակ ասել էր, որ սա նրանց վերջին աշխատավարձն է լինելու»: