Նամակ վարչապետին. Օրենքը մարտահրավեր է ՀՀ-ում ժողովրդագրական աճին

Ինչպես ավելի վաղ տեղեկացրել էինք՝ ՀՀ կառավարության շենքի դիմաց մի շարք քաղաքացիներ «Ժամանակավոր անաշխատունակության նպաստների մասին» ՀՀ օրենքում փոփոխություններ մտցնելու օրինագծի դեմ  այսօր բողոքի ակցիա էին կազմակերպել : Ավելի ուշ ակցիայի մասնակիցները՝ ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնության անդամները,  ՀՀ վարչապետ Հովիկ Աբրահամյանին են հանձնել իրենց ծավալուն նամակը՝ առաջարկություններով հանդերձ:

Նամակում, մասնավորապես ասված է.
«Ինչպես տեղյակ եք, սոււյն թվականի սեպտեմբերի 25-ին ՀՀ Կառավարությունը քննարկել է ՀՀ աշխատանքի և սոցիալական հարցերի նախարարության կողմից ներկայացված «Ժամանակավոր անաշխատունակության նպաստների մասին» ՀՀ օրենքում լրացումներ և փոփոխություններ կատարելու մասին և «Պետական նպաստների մասին» ՀՀ օրենքում փոփոխություններ կատարելու մասին ՀՀ օրենքների նախագծերի փաթեթը: Նախագծերի փաթեթում առաջարկվում է վերոնշյալ օրենքում կատարել մի քանի փոփոխություններ, որոնք խնդրահարույց են և արդարացիորեն առաջացրել են ՀՀ բազմաթիվ քաղաքացիների մտահոգությունը:

Նկատի ունենալով վերոնշյալ օրենքի կարևորությունը ՀՀ քաղաքացիների սոցիալական իրավունքների պաշտպանության, Հայաստանում կանանց և տղամարդկան հավասար հնարավությունների ապահովման և ՀՀ միջազգային պայմանագրերով ստանձնված պարտավորությունների իրականացման տեսանկյունից, ինչպես նաև էապես մտահոգված լինելով Հայաստանում առկա անբարենպաստ ժողովրդագրական իրավիճակի խորացման հիմնախնդրով` կոչ ենք անում ՀՀ կառավարարությանը ձեռնպահ մնալ «Ժամանակավոր անաշխատունակության նպաստների մասին» ՀՀ օրենքում ստորև թվարկված փոփոխությունները կատարելուց»:

Այնուհետ նշվում է, որ ողջունելով ՀՀ կառարավարության` չաշխատող մայրերին մայրության նպաստ
տրամադրելու մտադրությունը՝ իրենք հավատացած են , որ չաշխատող մայրերին աշխատող մայրերի հաշվին փոխհատուցելու Կառավարության մոտեցումը ոտնահարում է ՀՀ միջազգային պայմանագրերով նախատեսված մարդու և քաղաքացու մի շարք սոցիալական իրավունքներ, հակասում է ՀՀ կողմից որդեգրված մի շարք քաղաքականություններով սահմանված սկզբունքներին:

Ըստ նամակի հեղինակների՝ օրենքը հակասում է ՀՀ ռազմավարական գերակայություններին, այն հանդիսանուըմ է մարտահրավեր ՀՀ-ում ժողովրդագրական աճի համար, օրենքը ոտնահարում է սոցիալական արդարության սկզբունքները և ոտնահարում է սոցիալական պաշտպանության իրավունքները, խախտում է աշխատողների իրավունքը, ոտնահարում է նաև երեխայի իրավունքները և այլն:

«Հաշվի առնելով վերոնշյալները կոչ ենք անում ՀՀ կառավարությանը ձեռնպահ մնալ «Ժամանակավոր անաշխատունակության նպաստների մասին» ՀՀ օրենքում վերոնշյալ խնդրահարույց, խտրական և չափազանց վտանագավոր փոփոխությունները կատարելուց:
Ակնկալում ենք Ձեր հրապարակային և գործնական պատասխանը սույն նամակին: Մենք պատրաստակամ ենք Ձեզ հետ հանդիպելու և մեր մտահոգությունները առերես և հրապարակավ Ձեզ հետ քննարկելու: Հայտնում ենք ձեզ, որ մեր ձայնը լսելի չդառնալու դեպքում օգտվելու ենք օրենքով մեզ վերապահված բոլոր իրավունքներից` ներառյալ «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքով նախատեսված իրավունքից», - հավելել են Ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնության անդամները:

Նախորդող`
Բողոքի ակցիա` մայրության նպաստի կրճատման դեմ