Ա. Մանուկյանին ծեծի ենթարկելու դեպքի վայրում տեսանկարահանող սարք է եղել

Արամ Մանուկյանին ծեծի ենթարկելու փաստի առթիվ նյութեր են նախապատրաստվել Երևանի քննչական վարչության Արաբկիրի քննչական բաժնի վարույթում: Այս մասին Panorama.am-ին հայտնեց Քննչական կոմիտեի մամուլի խոսնակ Սոնա Տռուզյանը:
Նրա խոսքով, նշանակվել է դատաբժշկական փորձաքննություն:

«Դեպքի վայրի զննությամբ պարզվել է, որ տեղանքում առկա է նաև տեսանկարահանող սարք, որի տեսագրությունը արդեն իսկ վարույթ իրականացնող մարմինը հետազոտում է»,-ասաց Տռուզյանը:

Կոմիտեի մամուլի խոսնակն ասաց, որ հանձնարարություններ են տրվել ոստիկանության օպերատիվ որոնողական մարմիններին հնարավորինս արագ միջոցառումներ ձեռնարկել առերևույթ հանցագործություն կատարած անձի ինքնությունը և դեպքի որոշ հանգամանքներ պարզելու ուղղությամբ:

Հիշեցնենք, որ երեկ Երևանի Սոսեի 2/2 հասցեում անհայտ անձիք հարձակվել են ԱԺ ՀԱԿ խմբակցության քարտուղար Արամ Մանուկյանի վրա և ծեծի ենթարկել:

Մանուկյանի որդին Panorama.am-ին քիչ առաջ փոխանցեց, որ այս պահին պատգամավորը բուժզննում է անցնում Հանրապետական հիվանդանոցում, իրեն լավ է զգում:

Նախորդող հրապարակում՝
Արամ Մանուկյանը բուժզննում է անցնում