Ըմբշամարտի ԵԱ. Արթուր Ալեքսանյանը քառորդ եզրափակչում է

Սերբիայի Նովի Սադ քաղաքում ընթանում է հունահռոմեական ոճի ըմբշամարտի Եվրոպայի առաջնությունը: Օլիմպիական չեմպիոն Արթուր Ալեքսանյանը 98 կգ քաշային կարգում դուրս է եկել քառորդ եզրափակիչ:

ՀԱՕԿ-ի հաղորդմամբ, Ալեքսանյանը մեկնարկել է որակավորման փուլից, որտեղ հաղթել է լիտվացի Վիլիուս Լաուրինաիտիսին, ապա սերբ Միխեիլ Կաջայային: Քառորդ եզրափակչում Արթուրը կմրցի Նորվեգիայի ներկայացուցիչ Ֆելիքս Բալդաուֆի հետ:

Գերծանր քաշային Վաչիկ Եղիազարյանն առաջին գոտեմարտում հաղթել է Նիկոլաոս Լեոնին (Հունաստան), սակայն քառորդ եզրափակչում պարտվել Բալինտ Լամին (Հունգարիա):

59 կգ քաշային Գեւորգ Ղարիբյանը մեկնարկային գոտեմարտում զիջել է Տալեհ Մամադովին (Ադրբեջան), իսկ 66 կգ Կարեն Ասլանյանը` Աթական Յուկսելին (Թուրքիա):