Վլադիմիր Կարապետյան. Այլևս չեմ կատարում վարչապետի մամուլի քարտուղարի պարտականությունները

Այսօրվանից այլևս չեմ կատարում վարչապետի մամուլի քարտուղարի պարտականությունները։ Նման գրառում է կատարել ֆեյսբուքյան իր էջում Վլադիմիր Կարապետյանը։

«Վարչապետ Փաշինյանի գրասենյակում աշխատելու այս մեկ տարին գերազանց փորձ էր: Ինչպես խոստացել էի նշանակումից առաջ՝ գործս արել եմ հավեսով ու նվիրումով։ Շնորհակալ եմ»,-գրել է նա։

Կարապետյանի ազատման լուրերն ակտիվորեն շրջանառվում էին երեկվանից։

Կառավարության էջում հունվարի 8-ի ամսաթվով է հրապարակվել Կարապետյանին ազատելու վերաբերյալ վարչապետ Նիկոլ Փաշինյանի որոշումը, որտեղ մասնավորապես ասված է.

«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 10-րդ մասով.

Վլադիմիր Կարապետյանին ազատել վարչապետի մամուլի քարտուղարի պաշտոնից»։

«Հանրային ծառայության մասին» ՀՀ օրենքի 9-րդ հոդվածի 10-րդ մասը սահմանում է. «Պետական հայեցողական պաշտոններ զբաղեցնող անձանց նշանակում և ազատում է այն պետական մարմնի ղեկավարը կամ ենթակա պետական մարմնի ղեկավարը, որտեղ նրանք լինելու են աշխատանքային հարաբերությունների մեջ, բացառությամբ սույն հոդվածի 14-րդ մասով նախատեսված դեպքերի»։