Գործող վարչախումբը միացրեց իր ռեպրեսիվ մեքենան և սկսեց բռնաճնշումները շարժման մասնակիցների նկատմամբ. Չալաբյան

«Երեկ գործող վարչախումբը միացրեց իր ռեպրեսիվ մեքենան, և սկսեց բռնաճնշումները շարժման մասնակիցների նկատմամբ, արդյունքում մեր պայքարի ընկերներից երկուսը անհիմն և ապօրինի որոշումներով  ազատազրկվել են»,- նշում է «Հայաքվե» նախաձեռնության համահիմնադիր Ավետիք Չալաբյանը։ 

Նա հայտնում է, որ Տավուշը հանուն հայրենիքի» շարժման մասնակից Մեսրոպ Եսայանը երեկ ենթարկվել է երկու ամսով տնային կալանքի (ընդ որում կալանքը տնայինով է փոխարինվել միայն այն պատճառով, որ նույն օրը Մեսրոպի երրորդ զավակն էր լույս աշխարհ եկել),  իսկ Գնել Պետրոսյանը դատապարտվել է մեկ ամսով կալանքի և տեղափոխվել «Արմավիր» քրեակատարողական հիմնարկ:

«Իմ զորակցությունն եմ հայտնում Մեսրոպին և Գնելին, որոնց հետ պատիվ եմ ունեցել մասնակցել շարժմանը նրա առաջին օրերից, և որոնք ողջ այս ընթացքում աննկուն շարունակել են պայքարը:

Այսուհետև մեր պայքարը նաև նրանց ազատության համար է, ինչպես և բոլոր քաղբանտարկյալների նկատմամբ արդարության վերականգման: Մինչ այդ, կամք ու կորով եմ ցանկանում մեր ընկերներին՝ անցնելու այս փորձության միջով, և նոր ուժով վերադառնալու շարժման շարքերը»,- գրել է Ավետիք Չալաբյանը։