Երևանի Բժշկական համալսարանում բռնկված հրդեհի առնչությամբ կտրվի փորձագիտական եզրակացություն

Նախօրեին Երևանի պետական Բժշկական համալսարանի լաբորատորիայում բռնկված հրդեհի հետևանքով տուժածի վիճակը գնահատվում է կայուն: Այս մասին Panorama.am-ին ասացին ԵՊԲՀ հասարակայնության հետ կապերի բաժնից։ 

Ինչ վերաբերում է հրդեհի բռնկման պատճառներին, Երևանի Բժշկական համալսարանից  փոխանցեցին, որ պատահարի առնչությամբ կտրվի փորձագիտական եզրակացություն: 

Հիշեցնենք, որ սեպտեմբերի 21-ին, ժամը 19։04-ին Ճգնաժամային կառավարման ազգային կենտրոն ահազանգ է ստացվել, որ Երևանի Բժշկական համալսարանի աշխատասենյակներից մեկում հրդեհ է բռնկվել։ Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, Հրդեհաշիջման և փրկարարական աշխատանքների կազմակերպման բաժնի հերթապահ խումբը և  Ճառագայթային, քիմիական և կենսաբանական իրավիճակի մոնիտորինգի բաժնի քիմիկ-հետախույզը։ Պարզվել է, որ հրդեհը բռնկվել է համալսարանի 7-րդ հարկի լաբորատորիայում: 

Հրդեհը մեկուսացվել է ժամը 19։50-ին, մարվել՝ 20։14-ին: Այրվել են լաբորատորիան՝ գույքով (մոտ 6 քմ) և միջանցքի կախովի առաստաղը (մոտ 12 քմ)։ Մեկ անձ հոսպիտալացվել է բժշկական կենտրոն։ Հրշեջ-փրկարարները կանխել են հրդեհի տարածումը դեպի հարակից սենյակներ։