Ըստ ապացույցի, կարելի է հանգել հետևության՝ Ազատի կացարանում վառարան չպետք է լիներ. Տուժողների շահերի ներկայացուցիչ

Գեղարքունիքի մարզի ընդհանուր իրավասության դատարանում ընթանում է Ազատ գյուղի զինվորական կացարանում զոհված 15 զինծառայողների գործով դատական հերթական նիստը, ներկայացվում են գործով առկա ապացույցները։ 

Տուժողների շահերի ներկայացուցիչ Նորայր Նորիկյանն ասաց, որ ապացույցներից մեկով հիմնավորվում է հետևյալը՝  ինժեներասակրավորային վաշտի անձնակազմին 2022-2023 թվականների ձմռանը կացարանի ջեռուցումը ապահովելու համար որևէ վառելիք, վառելանյութ չի հատկացվել, ընդգծվում է, որ, ըստ երևույթին, կացարանը պետք է ջեռուցվեր  էլեկտրական տաքացուցիչների միջոցով։

«Այստեղից  կարելի է  հանգել հետևության, որ տվյալ կացարանում  այդ ձմռանն ընդհանրապես վառարան չպետք է լիներ, որևէ  վառելիք ու վառելանյութ նախատեսված չի եղել։ Ես կարող եմ հանգել հետևության, որ եթե իսկապես իրականացվեր  էլեկտրական ջեռոցների միջոցով և այդ վառարանը չլիներ, հնարավոր է, որ այս ողբերգությունն էլ  տեղի չունենար։ Դրանից կարելի է  հանգել հետևության, որ կամ վաշտի հրամանատարի, կամ  ծառայության պետի, կամ պատասխանատու սպաների,  կամ իրենց վերադասների ինքնագլուխ  գործունեության հետևանք է եղել այդ կացարանում վառարան տեղադրելը կամ ավելի բարձր հրամանատարության  հանձնարարությունը, հակառակ դեպքում ստացվում է հետևյալը՝ որևէ  իրավական նորմի կամ որևէ հրամանի բացակայության պայմաններում այդ  կացարանում վառարան է տեղադրվել և ապահովվել է  այդ եղանակով ջեռուցում։

Հակառակ դեպքում, ինձ համար անհասկանալի է, եթե  պետք է վառարանով ապահովեր, վառելանյութ հատկացվեր, ինչու  չի հատացվել 2022-2023 թվականների ձմռան ամիսներին տաքացնելու նպատակով և եթե չի հատկացվել, այլ հարց է առաջանում՝  5 լիտրանոց  բենզիններն ինչի՞ համար էին հատկացվել,  ինչ պատճառաբանությամբ, եթե այս տեղեկանքի համաձայն կացարանը պետք է ջեռուցվեր էլեկտրական ջեռոցներով»։

Հիշեցնենք, որ 2023-ին հունվարի 19-ին, ժամը  01.30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել էր 15 ժամկետային զինծառայող, 7 զինծառայող տեղափոխվել էր հոսպիտալ։