Իրանն արձագանքում է Թրամփին. Եթե իրանական նավահանգիստների անվտանգությունը սպառնալիքի տակ լինի, Պարսից կամ Օմանի ծոցերի ոչ մի նավահանգիստ անվտանգ չի մնա

Իրանական կողմն արձագանքել է ԱՄՆ նախագահ Դոնալդ Թրամփի ասյօր հնչեցրած սպառնալիքներին։ Իրանական ԶԼՄ-ների փոխանցմամբ,  «Խաթամ ​​ալ-Անբիա» կենտրոնական շտաբի խոսնակը նշել է, որ Պարսից և Օմանի ծոցերում անվտանգության ապահովումը կոլեկտիվ գործ է, հայտարարելով, որ նման անվտանգությունը պետք է վերաբերի բոլորին կամ ոչ մեկին։

Հայտարարության մեջ ընդգծվում է, որ Իրանի զինված ուժերը ազգային իրավունքների պաշտպանությունը համարում են բնական և օրինական պարտականություն, ներառյալ երկրի տարածքային ջրերում ինքնիշխանության իրականացումը։

«Խաթամ ​​ալ-Անբիա» կենտրոնական շտաբի խոսնակը հավելել է, որ Իրանի ջրերում ծովային անվտանգության պաշտպանությունը կշարունակվի վճռականորեն, և վերահաստատել է, որ թշնամու ուժերին կապված նավերին թույլատրված չէ անցնել Հորմուզի նեղուցով։

Հայտարարության համաձայն, այլ նավերը կարող են շարունակել տարանցումը նեղուցով, եթե համապատասխանեն Իրանի զինված ուժերի կողմից սահմանված կանոնակարգերին։

«Շարունակական սպառնալիքների պատճառով Իրանը կներդնի Հորմուզի նեղուցը վերահսկելու մշտական ​​մեխանիզմ նույնիսկ հակամարտության ավարտից հետո»,-ասված է հայտարարության մեջ։

Նա  նաև անօրինական է որակել ԱՄՆ-ի կողմից միջազգային ջրերում ծովային տեղաշարժի վրա դրված սահմանափակումները և դրանք բնութագրել է որպես ծովահենության գործողություններ։

Խոսնակը զգուշացրել է, որ եթե իրանական նավահանգիստների անվտանգությունը սպառնալիքի տակ լինի, Պարսից կամ Օմանի ծոցերի ոչ մի նավահանգիստ անվտանգ չի մնա։