Եվրոպայում անոմալ շոգերից առնվազն 1300 մարդ է մահացել. ԱՀԿ

Եվրոպայի  ամռան աննախադեպ շոգը կարող է հարյուրավոր մարդկանց մահվան պատճառ դառնալ։ Նման ահազանգ  հնչեցրել  Առողջապահության համշխարհային կազմակերպության ղեկավարը։

Երեկ  Եվրոպայում կրկին ջերմաստիճանի ռեկորդներ են գրանցվել, այդ թվում՝ Գերմանիայում, Լեհաստանում և Չեխիայում, քանի որ ծայրահեղ շոգը շարունակել է շարժվել դեպի արևելք։

BBC-ի  փոխանցմամբ՝ X-ում գրառման մեջ ԱՀԿ-ի ղեկավար Թեդրոս Ադհանոմ Գեբրեյեսուսը նշել է, որ հունիսի 21-ից ի վեր գրանցվել է ավելի քան 1300 մահվան դեպք, որոնք «կապված են Եվրոպայում բարձր ջերմաստիճանների հետ»։

«Ջերմային սթրեսը հաճախ անվանում են «լուռ մարդասպան», և եվրոպական տները, աշխատավայրերը և դպրոցները չեն կառուցվել այս ջերմաստիճանների համար», - ասել է նա։

Երեկ առավոտյան Ֆրանսիայի առողջապահության նախարարությունը հայտարարել է, որ չորեքշաբթի օրվանից երկրում գրանցվել է մոտ 1000-ով ավելի մահ, քան ակնկալվում էր։

Գործակալությունը հայտնել է, որ մահացությունների մեծ մասը 65 տարեկանից բարձր մարդկանց շրջանում է։

Նա նշել է, որ մայրցամաքում միլիոնավոր մարդիկ ներկայումս ապրում են ծայրահեղ շոգի պայմաններում, հարյուրավոր մարդիկ մահացել են, դպրոցները փակ են, իսկ էլեկտրական ցանցերը փլուզվում են։

Գերմանիայում գրանցվել է պատմության մեջ ամենատաք օրը՝ երրորդ օրն անընդմեջ, այն բանից հետո, երբ երկրի արևելքում գրանցվել է 41.7 աստիճան Ցելսիուս, ցույց են տվել նախնական տվյալները։

Լեհաստանի սահմանի մոտ գտնվող Կոշեն քաղաքի կայանում տեղական ժամանակով ժամը 16:00-ի սահմաններում գրանցվել է 41.7°C ջերմաստիճան։

Չեխիայի Հանրապետությունը երկու օրվա ընթացքում սահմանել է ջերմաստիճանի երկրորդ ռեկորդը՝ Պրահայից հյուսիս գտնվող Դոքսանիում գրանցելով 41.1°C։ Հայտնում է CHMI օդերևութաբանական ինստիտուտը։

CHMI-ը հայտնել է, որ շոգը գագաթնակետին կհասնի կիրակի օրը, իսկ արևմտյան շրջաններում փոթորիկներ են կանխատեսվում ավելի ուշ։

Լեհաստանը նաև գերազանցել է իր բոլոր ժամանակների ջերմաստիճանի ռեկորդը՝ Սլուբիցե քաղաքում գրանցվելով 40.5°C, կիրակի օրը AFP լրատվական գործակալությանը հայտնել է Օդերևութաբանության և ջրային ռեսուրսների կառավարման ինստիտուտի (IMGW) խոսնակը։

Նա կոչ է արել եվրոպական երկրներին «իրականացնել ջերմային առողջության գործողությունների ծրագրեր»՝ որպես կլիմայի փոփոխության պայմաններում առողջությունը պաշտպանելու ջանքերի մաս։

Ծայրահեղ եղանակային պայմանները եվրոպական իշխանություններին ստիպել են կտրուկ միջոցներ ձեռնարկել շոգի հետ կապված հիվանդությունները կանխելու համար։

Հինգշաբթի օրը Հոլանդական Defqon.1 երաժշտական ​​փառատոնը չեղարկվել է ծայրահեղ շոգի նախազգուշացման պատճառով, իսկ Փարիզում պաշտոնյաներն արգելել են հասարակական վայրերում ալկոհոլ օգտագործելը և չեղարկել են նաև քաղաքի հպարտության երթը։

Ֆրանսիայում շոգի ալիքի սկզբից ի վեր անվերահսկելի ջրային գոտիներում խեղդվել է առնվազն 74 մարդ։