Իրանը մոտակա ժամանակահատվածում կպատասխանի Թրամփի նամակին

Իրանի իշխանությունները շուտով կպատասխանեն ԱՄՆ նախագահ Դոնալդ Թրամփի՝ Իսլամական Հանրապետության գերագույն առաջնորդ այաթոլլա Ալի Խամենեիին ուղղված նամակին։ ՏԱՍՍ-ը գրում է, որ այդ մասին հայտարարել է Իրանի արտգործնախարար Աբբաս Արաղչին։

«Մենք, միանշանակ, ուղղակի բանակցություններ չենք վարի ճնշման, սպառնալիքների և պատժամիջոցների ուժեղացման ներքո: Բանակցությունները պետք է ընթանան հավասար պայմաններով: Մենք կպատասխանենք Թրամփի նամակին մոտ օրերս և այն կուղարկենք համապատասխան ուղիներով»,-ասել է նա Իրանի պետական ​​հեռուստառադիոընկերության եթերում:

Ինչպես նշել է Արաղչին, Թրամփի նամակը «սպառնալիքներ է պարունակում»։ «Բայց դա նաև ասում է, որ կան հնարավորություններ, մենք կտեսնենք և՛ սպառնալիքներ, և՛ հնարավորություններ»,- հավելել է դիվանագետը։

Թրամփը բազմիցս սպառնացել է Իրանին ռազմական ուժով, եթե Թեհրանը համաձայնության չգա Վաշինգտոնի հետ Իրանի միջուկային ծրագրի շուրջ։ Ամերիկացի առաջնորդը հրաման է ստորագրել վերադառնալ առավելագույն ճնշման քաղաքականությանը՝ հայտարարելով, որ թույլ չի տա Իրանին միջուկային զենք ստեղծել։ Խամենեին ընդգծել էր, որ Թեհրանը ճնշման տակ չի բանակցի։