CNN. ԱՄՆ հետախուզությունը խոստովանում է, որ Իրանը դեռ շատ հեռու է միջուկային զենք ստեղծելուց

Ամերիկյան հետախուզական գործակալությունները, հակառակ Իսրայելի իշխանությունների և ԱՄՆ նախագահ Դոնալդ Թրամփի հայտարարություններին, եզրակացրել են, որ Իրանը չի ձգտում միջուկային զենք ստեղծել։ Այդ մասին հաղորդում է CNN-ը՝ հղում անելով չորս աղբյուրների:

Իսրայելը հունիսի 13-ին ռազմական գործողություններ սկսեց Իրանի դեմ՝ այն պատրվակով, որ Թեհրանը մոտենում է միջուկային զենք ստեղծելու փուլին: CBS-ը երեքշաբթի օրը հաղորդել է, որ, ըստ Թրամփի, Իրանը «շատ մոտ է» միջուկային զենք ունենալուն:

«Իրանը ոչ միայն ակտիվորեն չի աշխատում միջուկային զենք ստեղծելու ուղղությամբ, այլև երեք տարի հեռու է այն արտադրելու և ընտրված նշանակետին հասցնելու հնարավորությունից»,-«ՌԻԱ նովոստի»-ն գրում է, որ աղբյուրներին մեջբերել է CNN-ը։

Հեռուստաալիքի աղբյուրների փոխանցմամբ՝ ԱՄՆ հետախուզության աշխատակիցները կարծում են, որ ընդամենը մի քանի օրվա ռազմական գործողությունների ընթացքում Իսրայելը կարողացել է ընդամենը մի քանի ամսով դանդաղեցնել Իրանի միջուկային ծրագրի զարգացումը։

Աղբյուրները նաև հեռուստաալիքին հայտնել են, որ Թրամփի վարչակազմը հասկանում է, որ Իսրայելը միայն Միացյալ Նահանգների օգնությամբ կարող է ոչնչացնել Իրանի միջուկային ծրագիրը։

Իսրայելը հունիսի 13-ի գիշերը գործողություն սկսեց Իրանի դեմ՝ մեղադրելով նրան գաղտնի ռազմական միջուկային ծրագիր իրականացնելու մեջ, որը, ենթադրաբար, հասել էր անդարձելի կետի։ Դիվերսիոն խմբերի, օդային ռմբակոծությունների և ասպատակությունների թիրախներն էին միջուկային օբյեկտները, գեներալները, ականավոր միջուկային ֆիզիկոսները, ավիաբազաները, հակաօդային պաշտպանության համակարգերը և «երկիր-երկիր» դասի հրթիռները։ Իրանը պատասխանեց գերձայնային հրթիռներով,երկու կողմերում էլ կան ավերածություններ և զոհեր։