Հսկիչները տրանսպորտում զինված են համապատասխան սարքավորումներով. Սուրեն Գրիգորյան

«Հսկիչները շրջելու են, նրանք զինված են համապատասխան սարքավորումներ, որոնց միջոցով հնարավորություն ունեն ստուգել, թե քաղաքացին տրանսպորտում վճարում իրականացրե՞լ է, թե՝ ոչ»,-ասուլիսում հայտնեց Երևանի քաղաքապետի տեղակալ Սուրեն Գրիգորյանը։

Փոխքաղաքապետը հայտարարեց, թե գումարի հավաքագրման խնդիր չեն լուծում տուգանքի տեսքով, ուղղակի քաղաքացիները պետք է վճարեն ուղեվարձը։

«Մենք պետք է համոզված լինենք, որ մարդիկ չարամտորեն չեն հրաժարվում ուղեվարձը մուծելուց, որի դրսևորումն էլ շատ կա»,- ասաց Գրիգորյանը՝ նշելով որ առաջին օրերին պարզելու են, թե ովքեր չարամտորեն չեն վճարում և ովքեր՝ անտեղյակությունից ելնելով։

Փոխքաղաքապետը հայտարարեց, որ բացահայտելու են բոլոր զեղծարարությունները և թոշակառուների կամ այլ արտոնյալ տոմսերից օգտվելու ձևերը։

Գրիգորյանը նշեց, որ արտոնյալ մեկ այլ քաղաքացու տոմսով երթևեկելու համար ամենամեծ տուգանքն է սահմանված։