Վիճաբանություն, միտումնավոր բաց քվեարկություն, սպառնալիք, անգործություն. «Անկախ դիտորդ»-ի արձանագրած խախտումները

Վաղարշապատ խոշորացված համայնքում համամասնական ընտրակարգով ավագանու ընտրությունների քվեարկության ընթացքում դիտորդական առաքելության իրականացնող «Անկախ դիտորդ» -ն արձանագրել է ընթացակարգային 3, վիճաբանության 2, ընտրողների կազմակերպված տեղաշարժի 3 դեպքեր։ Լրագրողներին ասաց  «Անկախ դիտորդ» դիտորդական առաքելության ներկայացուցիչ Դանիել Իոաննիսյանը՝ նշելով, որ առավոտից այցելել են  շուրջ 40 ընտրատեղամաս

Նա նշեց, որ արձանագրել են միտումնավոր բաց քվերակության 1 դեպք։

«Բաց քվեարկության դեպքեր շատ են արձանագրվել, բայց մեկն է, որ դիտորդների կողմից գրանցվել է որպես միտումնավոր բաց՝ ինչ-որ մեկին ինչ-որ բան ցույց տալու համար և ոչ թե օրինակ կարգին չտիրապետելու կամ քվեախցիկի հերթը շրջանցելու նպատակով»,- մանրամասնեց նա։

Իոաննիսյանը թվարկեց այլ արձանագրած խախտումներ՝ գտնվելու իրավունք չունեցող անձի կողմից տեղամասում գտնվելու 1 դեպք, սպառնալիքի 1 դեպք,  ընտրական հանձնաժողովի ղեկավարի անգործության 1 դեպք, գրանցամատյանի՝  էական թերություններով լրացման 4 դեպք, քվեարկության կտրոնի ժամանակավոր հափշտակության 1 դեպք, որը ընտրողը հետո վերադարձրել է։

«Քննարկում էինք՝ արդյոք դեպքը հանցագործության տարր պարունակում է, թե ոչ,  բայց որոշեցինք, չի պարունակում», - ասաց Դ. Իոաննիսյանը։