ՔՊ խմբակցությունը դեմ քվեարկեց Հայաստանում քաղբանտարկյալների իրավունքների պաշտպանությանն ուղղված հայտարարության տեքստին

«Անհերքելի է, որ այսօր Հայաստանում կան քաղբանտարկյալներ և այն ոչ միայն քաղաքական հայտարարություն է, այլ փաստարկված իրողություն։ Իշխանությունը վերածվել է քաղաքական հետապնդումների, հալածանքների և հաշվեհարդարների բացահայտ գործիքի, իսկ կալանքը՝ մարդկանց պատժելու և երկրում վախի մթնոլորտ սերմանելու միջոցի»,-ԱԺ նիստի մեկնարկին հայտարարության տեսքն ընթերցելիս ասաց Էլինար Վարդանյանը։

Ներկայացնելով հայտարարության տեքստը՝ ընդդիմադիր պատգամավորը նշեց, որ քաղաքական շարժառիթներով քաղաքական հետապնդման են ենթարկվում Հայաստանյան Առաքելական սուրբ Եկեղեցու արքեպիսկոպոսներ, հոգևոր սպասավորներ և ծառայողներ, լրագրողներ, ԱԺ պատգամավորներ, բլոգերներ, ակտիվ քաղաքացիներ։

Հայտարարության մեջ լիակատար համերաշխություն է հայտնվում քաղբանտարկյալներին, նրանց ընտանիքների անդամներին և ընկերներն, դատարանին կոչ է արվում գործել օրենքի սահմաններում,  ՄԻՊ-ին՝ ուշադրություն դարձնել հիմնախնդրին։

Նախագծում կոչ է արվում անհապաղ ազատ արձակել քաղբանտարկյալներին։

Հայտարարությանը բացասական եզրակացություն տված Պետական-իրավական հարցերի հանձնաժողովի նախագահ Վլադիմիր Վարդանյանը հայտարարեց, թե ԵԽԽՎ զեկույցում խոսք չկա քաղբանտարկյալների մասին, հետևաբար՝ նման խնդիր էլ չկա։

 Նրա խոսքով՝ եթե ԱԺ-ն հայտարարություն ընդունի ապա պաշտոնանկ պետք է արվեն Գլխավոր դատախազը, քննչական և իրավապահ կառույցների ղեկավարները։

«Դուք ուզո՞ւմ եք հավասարության նշան դնել Հայաստանի և այն երկրների միջև, որտեղ կան հազարավոր քաղբանտարկյալնե՞ր»,-հարցրեց  Վարդանյանը։

ՔՊ խմբակցության պատգամավորները դեմ քվեարկեցին, որպեսզի հայտարարության մասին որոշումն ընդգրկվի ԱԺ օրակարգ։