Պոլիկլինիկաներում որոշ նեղ մասնագետների կաբինետները գլորվում են դեպի փակում. Բժշկի ահազանգը

«Պոլիկլինիկաներում որոշ նեղ մասնագետների կաբինետները գլորվում են դեպի փակում և դրա միակ արդարացումը նախարարի կողմից «ցածր դիմելիություն» կոչվածն է»,-ահազանգում է պրակտիկ բժիշկ, առողջապահության ոլորտի կազմակերպիչ Գևորգ Գրիգորյանը։

Նա մանրամասնում է, թե ինչ պարտականություններ ունեն վարակիչ հիվանդությունների դեմ պայքարի կաբինետները և այնտեղ աշխատող մասնագետները՝

1. Վարակիչ հիվանդությունների վաղ ախտորոշում և բուժում

2. Վարակների վերահսկում և կանխարգելում

3. Կոնտակտային անձանց վերահսկում

4. Իմունոպրոֆիլակտիկա (սա արդեն հանձնված է ընտանեկան բժիշկներին)

5. Քրոնիկ ինֆեկցիաների կառավարում (օրինակ՝ Հեպատիտ B,C, HIV և այլն)

6. Համաճարակաբանական հսկողություն

7. Կրթական և խորհրդատվական դեր

«Այս ամենը արվում է բնակչության առողջությունը պահպանելու և հիվանդանոցային ծանրաբեռնվածությունը նվազեցնելու համար և ինչպես տեսնում եք, բացի «պացիենտ ընդունելուց» և «այցերի քանակ ապահովելուց», ինֆեկցիոնիստները ունեն մի շարք կարևոր գործառույթներ... Սակայն առողջապահության նախարարը կարծում է, որ այս գործառույթները կարող է պատվիրակել մեր այլ կոծեգաներին, ովքեր չունեն նեղ մասնագիտացված կրթություն և շատ մասնագիտական նրբություններ կան, որոնց չեն տիրապետում: Ցավալի գործընթաց է, որը կարելի է կասեցնել միայն բուժաշխատողների չվախենալու և համախմբվելու պարագայում, իսկ բուժաշխատողները դեռ հույսեր են փայփայում, որ ինչ-որ բան կփոխվի...

Իրոք՝ ի՞նչն է խանգարում իրավաբանին ինֆեկցիոնիստի աշխատանքը հանձնարարել օրթոպեդին, ստոմատոլոգին կամ ընտանեկան բժշկին... Նման տրամաբանությամբ հրշեջներին պետք է վարձատրեն հանգցրած հրդեհների, իսկ ոստիկաններին՝ բացահայտած հանցագործությունների քանակի (չափազանց ցածր ցուցանիշ է) հիման վրա»,- նշում է Գրիհորյանը։