Իրաքում տեղի է ունենում Իրանի սպանված գերագույն առաջնորդ Ալի Խամենեի հուղարկավորությունը

Հազարավոր սգացողներ են հավաքվել Իրաքի Նաջաֆ քաղաքում, որտեղ սկսվել է Իրանի սպանված գերագույն առաջնորդ այաթոլլա Ալի Խամենեիի հուղարկավորության արարողությունը: Այս մասին  հայտնում են միջազգային լրատվամիջոցները։

Իրաքի իշխանություններն այսօր հայտարարել են  պետական ​​տոն, իսկ արարողությունները Նաջաֆում սկսվել են տեղական ժամանակով ժամը 6:00-ին։

Իրանը շաբաթ օրն էր  սկսել Խամենեիի համար  վեցօրյա հուղարկավորության արարողությունները՝ հույս ունենալով, որ արարողությունները կցուցադրեն ուժ և միասնություն Իրանի դեմ ԱՄՆ-Իսրայել պատերազմի ֆոնին, որը սկսվեց երկու երկրների կողմից Թեհրանի վրա փետրվարի 28-ին հասցված հարվածներով, որոնց հետևանքով զոհվեցին Խամենեի և նրա մի քանի հարազատներ։

Իրանի սուրբ քաղաք Ղոմում կազմակերպված զանգվածային երթից հետո՝ երեկ երեկոյան Նաջաֆի միջազգային օդանավակայանում իրաքցի պաշտոնյաներն ու բարձրաստիճան քաղաքական գործիչները ընդունեցին Խամենեիի աճյունը՝ Իրանի նախագահ Մասուդ Փեզեշքիանի և հանգուցյալ առաջնորդի ավագ որդու՝ Մոստաֆա Հոսեյնի Խամենեիի ներկայությամբ։

Խամենեիի հուղարկավորությունը տեղի կունենա հինգշաբթի օրը նրա հայրենի Մաշհադ քաղաքում, որը գտնվում է Իրանի հյուսիս-արևելքում։

Մոջթաբա Խամենեին, ով հոր սպանությունից կարճ ժամանակ անց գերագույն առաջնորդի պաշտոնը ստանձնելուց ի վեր դեռևս հանրությանը չի հայտնվել, նկատելիորեն բացակայել է երթերից։

Նշենք, որ նա վիրավորվել է հորը սպանած օդային հարվածների ժամանակ, սակայն նրա վնասվածքների ծանրության աստիճանը դեռևս պարզ չէ։

Նաջաֆից հետո Խամենեիի մարմինը կտեղափոխվի մոտ 60 կմ հյուսիս գտնվող Քարբալա՝ մեկ այլ երթի համար, որը կավարտվի երրորդ շիա իմամի՝ Իմամ Հուսեյնի և նրա եղբայր Աբբասի սրբավայրերում: