Կիրակի օրը Հովհաննավանքում Փաշինյանի հայտարարած ու նաև հովանավորած արարքները հանgագործnւթյnւն են. Թաթոյան

«Կիրակի օրը Հովհաննավանքում Փաշինյանի հայտարարած ու նաև հովանավորած արարքները հանցագործություն են, որոնք պատժելի են ՀՀ քրեական օրենսգրքով»,- նշում է «Միասնության թևեր» քաղաքական նախաձեռնության ղեկավար,  նախկին ՄԻՊ Արման Թաթոյանը։

Ըստ նրա, ՔՊ-ն գործում է հստակ կեղծիքների հստակ սխեմայով. «Նրանք ուղղակի քանդում են պետությունը, պառակտում մեր ժողովրդին իրար հետ, ավերում են Հայոց Եկեղեցին ու արժեքները»։ 

Արման Թաթոյանն ասում է, որ նախկին քահանա Ստեփան Աստարյանը վայելում է անձամբ Փաշինյանի հովանավորությունը, ակնհայտ է, որ նա գիտակցում է՝ Փաշինյանն անձամբ կանգնած է իր մեջքին։ 

«Ակնհայտ է, որ Ստեփան Ասատրյանի հետ տարվել է ու տարվում է նախապատրաստական աշխատանք, նրան սովորեցրել են, բայց նրան լավ չեն սովորեցրել»,- նշում է Թաթոյանը։

Ըստ նրա, աբսուրդ են այն հայտարարությունները, թե իբր Աշխատանքային օրենսգրքով են կարգավորվում հոգևորականին ձեռնադրելու և կարգալույծ անելու հարցերը. «Աշխատանքային իրավունքն ընդհանրապես կիրառելի չէ այս հարցերի նկատմամբ։ Հոգևորականին ձեռնադրելն ու կարգալույծ անելը կարգավորվում է եկեղեցական կանոններով»։ 

Հիշեցնենք, որ հոկտեմբերի 21-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի Հայրապետական տնօրինությամբ կարգալույծ է հռչակվել Տ․ Արամ քահանա Ասատրյանը: Կարգալույծ եկեղեցականն այդուհետ դասվում է աշխարհականների շարքին՝ Ստեփան Ասատրյան ավազանի անունով:

Եկեղեցու այդ հայտարարությունից հետո՝ Ստեփան Ասատրյանը հայտարարել էր, որ կիրակի պատրաստվում է պատարագ մատուցել։ Այնուհետև Նիկոլ Փաշինյանը հայտարարել էր, որ «կիրակի օրը Հովհաննավանքում մասնակցելու է Տեր Արամ քահանա Ասատրյանի մատուցած Սուրբ և Անմահ Պատարագին»։